Venezuela-in Colombia ramri hawng leh

Venezuela sorkar chuan mipuiten an ṭhenawm, Colombia-ah chakkhai an lam theihna turin Inrinni leh Pathianni khan ramri a hawng leh.

Colombia Foreign Ministry chuan Inrinni khan Venezuela mi 35,000 vel chu an mamawh dapkhawm turin an ramah an lut niin a sawi. Nimin khan darkar riat chhung ramri hi hawn chhunzawm leh a ni. Kar hmasa khan ramri hi hawn a lo ni tawh bawk a, hemi chhung hian mi 35,000 vel chu Colombia ramah hian an va bazar a ni.

Colombia Defence Minister Luis Carlos Villegas chuan Venezuela mipui≠ten an mamawh ang a lakkhawm kim theihna turin theihtawp an chhuah tih a sawi. Venezuela ram hian sum lamah harsatna a tawk nasa hle a, hei vang hian an ram chhungah ei leh bar lam pawh a harsa a, thil awmchhun pawh a man a sang chak hle. President Nicolas Maduro chuan ei leh bar, damdawi leh nitin khawsakna atana mamawh indaihlohna nasa tak an tawh mekah eptute chu mawhphurtuah a puh.