Nice beihna kaihhnawihah mi 7 man tawh

France rama Nice khawpui Bastille Day lawma mipui pungkhawm≠te beihna kaihhnawihah nimin thleng khan mi pasarih man an ni tawh.

Kar kalta Ningani zan khan Nice-a Bastille Day lawmna hmunah mi pakhatin a motor lian khalh lutin mi 84 a chil hlum a ni. Motor khalhtu, Tunisia mi Mohamed Lahouaiej-Bouhlel hi police-ten an kaphlum nghal a ni.

Police-ten rinhlelh thila an man zingh hian Lahouaiej-Bouhlel nupui pawha tel a, midangte erawh chu an nihna puanzar a ni lo.

France President Francois Hollande chuan Nice khawpuia pawikhawihna thleng chu firfiakte thiltih ngei niin a sawi a, motor khalhtu hian firfiak pawl nen inzawmna an nei em tih investigator-te chuan an chhui dawn a ni, a ti. President Hollande hian Nice khawpui hi a tlawh tawh a ni.

Health Ministry chuan hliam tuar zinga mi 121 chu damdawi-inah enkawl chhunzawm an la ni thu a sawi a, an zingah hian naupang 30 an tel. Hliam zinga mi 21-te chu an dinhmun a la ṭha lo hle.

Hetihlai hian Islamic State (IS) firfiak pawl chuan Nice khawpuia pawikhawihtu hi an pawl mi ngei niin an sawi.

France chuan Nice khawpui beih a nih hnuah an rama venhimna khauh zawka kalpu ia nih theihnan police reservist 12,000 chhawr a tum. Interior Minister Bernard Bazeneuve chuan France ram hmangaihtute chu reservist atan inziak lut a, an ramri venhimna kawnga security force-te pui turin a sawm.

Kar kalta Inrinni
aṭang khan Nice khawpui beihnaa thi te hi sunna hi neih a ni a, ni thum chhung sun an ni ang. Sorkar chuan ram chhung hmukn hrang hrangah venhim hna thawk tur hian police leh silpai 120,000 a dah mek a ni.