Baton Rouge-ah police officer pathum kaphlum

US-a Louisiana state-a Baton Rouge khawpuiah Pathianni zing khan mihang pakhatin Airline Highway-a petrol station-ah police officer pathum a kaphlum a, pawikhawihtu hi police-ten an kaphlum ve nghal. Police officer dang pathumin hliam an tuar bawk.

Police officer pathum kaphlumtu, African-American hi Gavin Long a ni a, US sipaiah kum nga a ṭang tawh a ni. Pawikhawihna a thlen hma hian African-American-te chunga police-te chetdana a lungawi loh thu a sawina video chu internet lamah a dahchhuak a ni. A video tihchhuahah hian eng thil pawh tiin, a chungah eng pawh thleng se, eng pawl mah zawm a nei lo tih a sawilang.

Kar hnih liamta khan Baton Rouge-ah hian police pakhatin mihang, Alton Sterling chu a lo kaphlum tawh a ni.

Louisiana Governor John Bel Edwards chuan Baton Rouge-a thil thleng chu pawikhawihna tenawm tak a ni tih a sawi a, midang thurualpui a neih hriat ni lo mah se, police-te chuan inhnamhnawih dang an awm leh awm loh an chhuizui mek.

Baton Rouge Mayor Kip Holden chuan White House official-te nen pawh inbiain, an thil chhuinaah a ṭul anga puih an inhuam thu a sawi.

Pawikhawihtu, Gavin Long hi US Marines-ah kum nga ṭangin, data netword specialist a ni a, sergeant rank thleng a kai hman a ni. Kum 2008 June - 2009 January chhung khan Iraq-ah a awm a ni. Sipaia a ṭan chhung hian chawimawina pawh a dawng nual a, heng zingahihan Marine Corps Good Conduct Medal, Iraq Campaign Medal, Global War on Terrorism Service Medal, National Defense Service leh Navy Unit Commendation Medal-te a tel. Kum 2012 khan University of Alabama-ah semester khat a zir a ni. Kum 2009-ah nupui neiin, 2011 ah an inṭhen a ni. Long hi African American group, Washitaw Nation member a ni a, he pawl hian African American chu America leilung fa dik tak niin an inchhal a ni.

Louisiana hi open-carry state a ni a, sila lei leh keng turin phalna neih kher a ngai lo.

Pathianni-a officer pathum kahhlum takte nen hian kumin chhungin US-ah police officer 30 chu an duty laia thah a ni tawh a, nikum tun ang hunah khan mi 16 thah an ni.