Myanmar state counselor leh Myanmar hel pawlte an inbia

Myanmar State Counselor Aung San Suu Kyi-i chuan Pathianni khan Yan-gon-ah an rama hel-pawl, sorkar nena inkah-hai thuthlung la siam duh lote chu remna siampui dan kawng zawngin inbiakna an neihpui.

Sorkar leh helpawlte pariatte chuan kum 2015, October15 khan inkahhai thuthlung, Nationwide Ceasefire Accord (NCA) an ziak a, hetihlai hian NCA hi helpawl pasarih chuan al a ziak ve duh lo a ni.

Myanmar rama remna leh muanna a awm theihna atana hma latu, National Reconciliation and Peace Center (NRPC)-ah Suu Kyi-i hi chairperson a ni bawk. Inbiaknaah hian sorkar aiawhte a ho a, helpawl lam hi Delegation for Political Negotiation (DPN) hmingin an tel a, United Nationalities Federal Council (UNFC) chairman U N'Ban La-an a ho. Member dangte chu Shan Stawte Progressive Party (SSPP) U Say Htin leh New Mon State Party (NMSP) Khun Abel Thut-te an ni.

Sorkar lam aiawh hian Suu Kyi-i bakah Preparatory Committee for Holding the 21st Century Panglong Ethnic Conference chairman Dr Tin Myo Win leh Minsiter of the State Counselor Office U Kyaw Tint Swe-te an tel bawk.

Panglong Conference Preparatory Committee member, U Hla Man Shwe chuan inbiakna hi ṭha taka neih ni mah se, inremna erawh siam thei rih lo tih a sawi.