Turkey-ah mi 6,000 chuang man tawh

Turkey sipai pawl khatin sorkar paihthlak tuma an beihna a hlawhchham hnuah, sorkar paihthlak tuma beihnaa inhnamhnawih mi 6,000 chuang man an ni tawh.

Sorkar chuan ram puma thuneihna leh an ram economy chu sorkar kutah a awm tih a sawi a, sorkar paihthlak tuma beitu sipai leh judiciary lam mi 6,000 chuang zet chu man an ni tawh a ni, a ti. President Tayyip Erdogan leh sorkar chuan US-a awm, Muslim sakhaw hruaitu Fethullah Gulen chu sorkar paihthlak tuma beihnaa a mawphurtuah an puh a ni.

Istanbul-a President chenna in kawtah sorkar thlawptu mi tam tak pungkhawmin, sorkar paithlak tuma beitute chu thi tura an chungthu relsak turin an phut. Erdogan chuan mipuite duhdan chu ngaihthah sak theih an ni lo tiin, "Democracy ramah chuan mipuite duhdan chu a lal ber tur a ni" a ti.

President Erdogan chuan Gulen kaihhruai firfiak pawl chuan Turkey Armed Forces a tichhia a ni tiin, sipai zinga Gulen-a thlawptu hrang hrangte chu man an ni a ti a, mahse Gulen chuan an puhna chu thudik lo niin a sawi thung. Prseident hian Gulen hi an rama thawn turin US-ah ngenna a thehlut nghal a ni.

Kar kalta Inrinni khan Labour Minister Suleyman Soylu chuan sorkar paihthlak tuma beihnaah US chu a inrawlh a rin thu a sawi a, mahse hei hi US Secretary of State John Kerry chuan thil awm lo tak a nih thu a sawi. Pathianni khan US chuan Turkey ram aṭanga US kaihhruai ṭangrual ramten Islamic State (IS) firfiak laka beihpui an thlak chu chhunzawm a nih tur thu a puang bawk.