Myanmar sipai sorkarin armed group 3-te firfiak pawlah puang

Myanmar-a sipai sorkar chuan an rama armed group pathum - Myanmar National Democratic Alliance Army (MNDAA), Ta’ang National Liberation Army (TNLA) leh Arakan Army chu firfiak pawlah a puang.

Sorkar enkawl Global New Light of Myanmar chuan heng pawl pathumte hi September 2 khan 'terror group' ah puan a ni tih a tarlang a, anti-terror law hnuaiah heng pawl pathumte nena inzawmna neite chu firfiaka chetnaa telah ngaih an ni, tiin State Administration Council (SAC) chairman, senoir general Min Aung Hlaing chuan a sawi.

Armed group pathumte hian nikum kumtawp lam khan sipaite beih letna turin Three Brotherhood Alliance an din a, an mi leh state chuan China leh Thailand ramri bul bakah Rakhine state khawthlang lamah chet an la zui a ni. Kumin August thla tawp lamah khan Arakan Amry chuan mi maktaduai khat chenna bial chu an thununna hnuaiah an dah tawh nia tarlan a ni bawk.

Sipai sorkar do let tura civil miten an din, People's Defence Forces (PDF) pawhin Mandalay bialah hma a sawn zel. PDF hi sipaiten civil sorkar an paihthlak taka politician leh activist-ten mipui sorkar aiawh tura an din, National Unity Government (NUG) in a din a ni. Hetih lai hian sipai sorkar chuan May, 2021 khan NUG hi firfiak pawlah a lo puang tawh a, NUG lam hian sipaite hi firfiak tiin an sawi ve bawk a ni.

Myanmar sipai hotu, Min Aung Hlaing chuan armed group pathum intelkhawm, Three Brotherhood Alliance chuan sipaite nena an inbeihnaah inphenna atan sorkar building leh pawisawi lo civil mite an hmang ṭhin niin a puh. Hei vang hian heng pawl member-te awmna khuaa chengte chu firfiakten an sahimna tura an hman lohna tura fimkhur turin a chah.