Israel PM-in Hamas-ten inremna tura rawtna an hnawl zel tih sawi; Hamas-ten inremna siam tur dang zelah Israel PM an puh thung

Israel prime minister Benjamin Netanyahu chuan Gaza Strip-a indona thleng meka inkahhai puan a nih theihna tura rawtna awm apiangte chu Hamas lam chuan a hnawl zel niin a sawi. Mahse Hamas lam chuan inremna siam tur dang zelah Israel PM chu an puh let thung.

An ram huna Nilainia news conference a neihah, Israel Prime Minister chuan, "Hamas ho chuan engkim an lo hnawl tawp zel. An ngaihdan hi an thlak pawh ka beisei a, an mi hren mekte him taka lak chhuah vek ka duh a ni," a ti. Hamas mi hrente him taka chhuah an nih theihna turin ramchhung leh ram pawn lam aṭangin Netanyahu hi inremna siam tura nawrna a nasa hle.

Hetih lai hian Hamas lam chuan inkahhai puan a, mi tangte chhuahna tura inremna siam tumna chu Netanyahu hian a dang zel niin a puh ve thung. Gaza-a inremna siam tur hian rawtna thar siam a ngai tawh lo a, Hamas ten an lo pawm tawh US ruahmanna siam chu pawm turin Israel chu nawr zawk tura an duh thu an tarlang.

Gaza-a inkahhai puan a nih theihna atana palai hna thawktu zinga mi, US chuan inremna hi siam a ni thei dawn hnai niin a sawi a, rawtna siam zinga 90% chu pawm a ni tawh a ni, a ti. US official chuan Egypt leh Qatar nena thawk hoin hma an la zel tih a sawi.