China President-in Africa-ah hna mtd 1 siam a tiam

China president Xi Jinping chuan nimin, September 5-a Beijing-a Forum on China-Africa Cooperation (FOCAC) summit-a thu a sawinaah Africa-ah hna maktaduai khat tal siam a tiam.

President Xi chuan Africa ram hrang hrangte tan China chuan loan leh thil danga puihna atan USD tld 51 a pe dawn tih sawiin, Africa khawmualpuia infrastructure project 30 tihchangtlunna kawngah pawh a pui dawn a ni, a ti. "Kan thawh hona hnuaiah kawng, rel kawng, school hospital, industrial park leh special economic zone te pawh kan siam tawh a. Heng project-te hian mi tam tak khawsak phung pawh thlakin, an chhawr ṭangkai a ni," a ti. China leh Africa mipuite thawh hona chuan thil ropui a thlen dawn a, khawvel chhim lam bial 'modernisation' na tura hma hruaitu tur a ni dawn tiin a sawi. Agriculture, infrastructure, trade leh investment lamah China chuan Africa nena thawhdunna thuk zawk neih a inpeih thu Xi chuan summit-a telte chu a hrilh. China hian nikum khan Africa tan hian loan, USD tld 4.61 puk tirna tur pawh a lo pawm tawh a ni.

Kumin hi FOCAC summit an neih ṭum kuana niin, vawiin hian a tawp ang. Summit-ah hian Africa ram hrang hrang 53 aiawh te an tel. China hi Africa trade partner lian ber niin, Africa khawmualpui aṭanga mineral, fuel leh metal thawnchhuah zinga hmun lia ṭhena hmun khat chu China-a thawn a ni, ram dang aṭanga bungrua an lak luh zinga 16% chu China ram aṭangin a ni bawk. China chuan African nen an insumdawntawnna hi kum 2035 ah chuan USD tld 300 a tling thei dawn niin a lo sawi tawh.