Yemen refugee camp bul beihnaah mi 40 thi

Yemen hmarthlang lama al-Mazrak refugee camp bul chu thlawhtheihna hmangin beih a ni a, mi 40 an thi.

Yemen media-te chuan thlawhtheihna hi Saudi Arabia ta niin an sawi a, mahse Yemen foreign minister chuan an ram khawpui, Sanaa awp mektu, Houthi helho tih niin a sawi thung.

Saudi Arabia kaihhruaiin Arab ṭang­rual ramte'n Yemen hel lakah beihpui an thlak a, Thawhṭanni zan khan Sanaa-a helho ralthuam dahna hmun an kap fuh a ni. Saudi Arabia navy-te chuan Yemen lawng chawlh hmunte chu helpawlte'n an hman theih loh turin an dang bawk.

Al-Mazark refugee camp-ah hian kum 2009 aṭanga Houthi leh Yemen sorkar sipaite inbeihna avanga hlaua tlanchhiate an awm a ni. International Organization for Migration (IOM) chuan refugee camp bula bomb thlak vang hian mi 200 velin hliam an tuar bawk niin a sawi.

Houthi helpawl hian President Abdabbuh Mansour Hadi-a kaihhruai sorkar chu eiruknaa inhnamhnawih nasaa puhin, paihthlak an tum a ni. President Hadi hi Sanaa aṭangin chhim lama Aden khawpuiah a tlanchhia a, mahse helho hian hma an sawn zel avangin Saudi Arabia khawpui, Riyadh-ah inhumhimna zawngin an tlanchhe leh a ni.

President Hadi hian Yemen ram pui turin Arab ramte hi a ngen a, a ngen angin Saudi Arabia kaihhruaiin Arab League chuan helte hi an bei ta a ni. Saudi Arabia chuan Hadi-a kaihhruai sorkar chu venghim tura a beih tur thu a sawi.