Britain lal Queen Elizabeth-i staff ten hlawh pun an phut

Britain lal, Queen Elizabeth-i staff, Windsor Castle-a thawkte chuan an hlawh leh allowance a tlem avangin hlawh pun an phut.

Castle staff-te hlawh hi kum khata pound 14,400 (Rs nuai 13.35) aṭangin a inṭan a, an hna pangngai bakah extra duty an nei a, mahse hengahte hian a hrana hlawh pek an ni tawh lo. Castle tlawhtute hruai kual, hrilhfiah leh damlo enkawl hna thlengin an thawk tel a ni.

Public and Commercial Services (PCS) Union chuan lal chhungkaw ina thawkte hi extra duty-ah extra allowance pek tiam ni mah se, a taka pek an ni lo tih a sawi. PCS Union-ah hian Windsor staff 200 zinga 120 an tel.

March 31-April 14 inkar hian nawrh huai­hawt duh leh duh loh chung­changah member-te vote hi lak a ni ang.

PCS general secretary Mark Serwotka chuan, "Hnathawktute hi an rinawm a, Castle tlawhtute chu lal ang maiin an lo dawngsawng ṭhin a ni," a ti. Hlawh san phutte hi uniformed warden, corridor leh room-a mipui tlawhtute lo dawngsawngtute, ticket office, cloakroom leh catering lama thawkte an ni.

Windsor Castle hi khawvela lal in luah lai zinga upa ber leh lian ber a ni a, kumtinin tlawhtu mi maktaduai 1.1 vel an awm a, heng aṭanga sum hmuh hi dollar makta­duai 25 vel a tling bawk. Pawisa hmuhte hi Royal Collection Trust-in lal in leh an thil neihte enkawlna atan a hmang ṭhin.