Myanmar sorkar leh helpawlte'n inkahhai thuthlung ziah an remti

Myanmar sorkar leh helpawl 16-te chuan rampum huapa inkahhai thuthlung duan an remti.

Myanmar hi kum 49 chhung zet sipai rorelna hnuaia a awm hnuah, kum 2011 khan semi-civilian sorkar a ding a ni. Sorkar thar hian helpawl hrang hrangte nena an inkar boruak siamṭhat a, inremna siampui chu a thil ngaih pawimawh zingah a dah a ni.

Inkahhai thuthlung duan hi nimin khan peihfel hman beisei a ni a, hei hi helpawl hrang hrang hruaitute hian an zirchiang leh dawn niin Myanmar Peace Center senior adviser Hla Maung Shwe chuan a sawi.

Shwe chuan, "Thil a kal tluang a nih chuan May thla hian helpawl hrang hrang hruaitute leh sorkar chuan Naypyitaw-ah Nationwide Ceasfire Agreement an ziak ang," a ti.

Helpawl zinga a tam zawk hi chi bing hel niin, an bial tana thu­neihna sang zawk pek phuta hel an ni. Sor­kar leh helpawlte hi kum 2013 aṭang khan inremna kawng zawngin ṭum sarih an ṭhu­khawm tawh a ni. Sorkar chuan kumin November thlaa an ram inthlanpui neih hma ngeia inremna siampui hman a duh a ni.