President hluiin politics a khelh theih loh nan Maldive-in dan siam

Maldive chuan an President aṭanga paihthlak, Mohamed Na­sheed-a'n politics a khelh chhunzawm theih tawh lohna tur dan siam­in Parliament-ah pass nghal a ni.

Dan siam tharah hian jail-a tangte chu political party-a member an nihna hlihsak an ni. Hei hi jail-a tang mek, President hlui Nasheed-a politics khel thei tawh lo tura siam tumna niin eptu lam chuan an ngai.

Thawhṭannia Parliament-a vote lakah, dan thar thlawp lamah vote 42 tlain, a duh lo lamah vote 2 chauh a tla. Nasheed-a party, Maldivian Democratic Party chuan he dan thar hi dodalin, vote pawh an thlak ve duh lo a ni.

President Yameen Abdul Gayoom-a party hian Parliament-ah majority a nei a, hei hi eptu lam nawrbehna atan a hmang niin sawiseltu lam chuan a sawi. Parliament-ah hian Nasheed-a hnena allowance leh security pek tihtawpna tur bill pawh ngaihtuah mek a ni bawk.

Nasheed hi President a nih laia senior judge manna tur thupek a tihchhuah tir avangin a thuneihna dik lo taka hmanga puhin man a ni a, March thla tir lam khan kum 13 tang tura thiam loh chantir a ni.

Maldivian Democratic Party hruaitu, Evan Abdulla chuan sorkar dan tharin an party a nghawng ve dawn lo a, Nasheed chu an party hruaitu a la ni chhunzawm zel dawn tih a sawi.