Myanmar sipaite airstrike-ah civil mi 11 an thi

Myanmar sipaiten an ram hmarlam, Shan state-a airstrike an neihah civil mi 11 an thi a, mi dang 11 in hliam an tuar bawk niin Ta'ang National Liberation Army (TNLA) chuan nimin, September 6 khan a tarlang.

TNLA thupuangtu, Lway Yao Oo chuan, "Zing dar khat velah Namhkam khuaa hmun pathum an rawn bomb a ni," a ti. Sipaite beihna avang hian he khuaa political party pakhat office pawh a chhe tel tih a sawi. Myanmar sipaiten thlawhtheihna hmanga an beihnaa thite mipa panga, hmeichhia pali leh naupang pahih an ni tih a sawi bawk.

Namhkam hi China ram bula awm niin, China Yunnan province aṭanga km 5 vel chauha hla a ni. Hun rei tak TNLA leh sipaite an inbeih hnuah, TNLA chuan he khua hi an thuhnuaiah a awm tawh niin a sawi.

Myanmar-a sipai sorkar dodaltu, armed group pathumte an ṭanho avang leh, civil sorkar aiawha din National Unity Goverment (NUG) in People's Defence Forces a din ve leh bawk avangin, civil sorkar paihthlatu sipaite hian Shan state-a hmun tam tak chu heng armed group kutah hian a hloh tawh a ni.

Hetih lai hian sipai hotu lu ber, Min Aung Hlaing chuan armed group awpna biala cheng civil mite chu inralring tura hrilh lawkin, armed group-te chu sipaite chuan na takin an bei let dawn tih a sawi a, TNLA chu firfiak pawlah an puang tawh bawk.

Kum 2021, February thlaa sipaiten Aung San Suu Kyi kaihhruai civil sorkar thuneihna hnehchhuh a, thuneihna an chelh aṭangin Myanmar-ah hian tualchhung buaina a la thleng chhunzawm reng a ni.

Tualchhung buaina avang hian mi mtkd 2.7 vel chu himna zawngin an chenna hmun an chhuahsan tawh niin United Nations chuan a tarlang.