Kenya : Primary school-a kangmei chhuakah zirlai 17 kang hlum

Kenya rama Nyeri county-a Hillside Endarasha Primary school dormitory-ah Ningani zan khan kangmei a chhuak a, zirlai 17 an kang hlum a, mi dang 13 in hliam na tak an tuar.

Police thupuangtu, Resila Onyango chuan kangmei chhuah chhan hi an chhui mek tih sawiin, mawhphurtu chunga action na tak lak a ni ang, a ti.

Ruang an hmuhte chu tunge an nih hriat loh khawpin an kang chhia tih a sawi a, kangmei chhuahna hmunah hian ruang dang pawh an la hmuh belh a rinawm tih a sawi bawk. Hliam tuar zingah ngaihtuahawm tak tak an awm tiin Onyango chuan a sawi.

Kenya ramah hian boarding school-ah kangmei hi a chhuak fo a, heng zingah hian zirlai lungawi loten nawrh an huaihawt laia an halte pawh a awm.

Ningani zana kangmei chhuahna primary school-ah hian zirlai 800 vel awmin, kum 5-12 inkar an ni.

President William Ruto chuan kangmei chhuak vanga nunna chan chhungte a tawrhpui thu sawiin, he thil thleng hi uluk taka chhui turin official-te a hrilh nghal thu a sawi.