China-ah thlipui tleh dawn vangin mi nuai 4 sawn chhuak

China chuan an ramah super typhoon Yagi a tleh dawn vangin nimin, September 6 thleng khan Hainan province-a cheng mi nuai li chuang chu hmun him lamah a sawn chhuak tawh. Nimin tlai lamah khan thlipui hian China hi a thlen rin a ni.

Typhoon Yagi hian chhim lam province, Guandong leh Hainan a nuai dawn nia sawi a ni a, ruah tam tak a ken tel avangin tuilian a thlen mai pawh a hlauhthawnawm hle.

China thuneitute chuan Hainan province-a chengte thiar chhuah hna hi thawkin; lawng, thlawhtheihna leh rel service te pawh tihtawp rih a ni bawk.

Hainan Meteorological Observatory director, Li Xun chuan thlipui tleh hian chhiatna nasa tak a thlen thei tih saiwin, mipuite pawh hmun him lama insaseng turin a ti. Hemi rual hian thuneitu lam pawh theihtawpa an lo inbuatsaih thu a sawi bawk.

Hainan khawpui, Haikou ah chuan mipuite pawh an theih anga lo inralringin, nimin lamah chuan khawlaia chhuak hmuh tur pawh an awm mang lo a ni.

Hainan-ah thlipui na tak thawk tur hi thleng khat tak niin, he hmuna typhoon thleng tawh chu an thawk na hlawm lo tlangpui a ni.

Kum 1949 - 2023 inkar khan Hainan-ah hian typhoon 106 an tleh tawh a, mahse heng zinga pakua chauh chu super typhoon-a chhiar an ni.

Guangdong-ah pawh thuneituten tuipuia sangha manna lawng chhuakte chu an ko kir vek a, vantlang huapa thiltih hona pawh cancel niin, mipuite chu pawn chhuak lo turin an chah.

Yagi hi kumina China rama thlipui tleh na ber tur zinga mi a ni a, a tleh nat zawng hi darkar khata km 230 niin, Category 4 hurricane tluk a ni.