Nigeria President atan Buhari

Nigeria President thlanna neih zawh takah eptu pawl candidate Muhammadu Buhari chuan President ṭanglai Goodluck Jonathan hnehin a tling.

Tun ṭum hi Nigeria mipuite'n democracy dan anga an ram President an thlanna hmasa ber a ni a, mi maktaduai 2.57 in vote an thlak a ni. Kum 1960-a Nigeria-in independence a hmuh aṭang khan sipai chakna hmangin ṭum ruk sorkar paihthlak a ni tawh a, Jonathan-a party kaihhruai hian kum 16 chhung civil sorkar a siam tawh bawk.

President atana thlan thar, Buhari hi sipai general hlui niin kum 72 a ni. Kum 1980 khan sipai sorkar a lo ho tawh a, mahse tunah hian democrat ṭha takah a inlet tawh niin a sawi.

Independent National Electoral Commission (INEC) chuan Progressives Congress (APC) candidate Buhari hian vote tla aṭangin 53.95%, vote 15,424,921 a hmu a, rorellai Peoples Democratic Party (PDP) candidate Goodluck Jonathan chuan 44.96%, vote 12,853,162 a hmu tih a tarlang.

INEC chairman Attahiru Jega chuan, "APC candidate Muhammadu Buhari hian President tling tura danin vote hmuh ngai zat tura a bithliah a hmuh phak avangin a tling tih puan a ni," a ti.

President thlanna hi kar kalta Inrinni leh Pathianni khan neih a ni a, vote thlakna atan technology thar hman a nih avangin hmun ṭhenkhatah khawl lam fel lo a awm a, hei vang hian vote thlak hun pawh hi pawhsei a ni.

Jonathan chuan a chak loh a pawm thu hi Thawhlehni zan khan sawiin, Buhari hi biain lawmpuina a hlan nghal a ni. Jonathan chuan, "Kan ramah inthlan felfai leh dik kalpui ka tiam a, ka thutiam pawh ka hlen a ni," tiin, amah thlawptu result-a lungawi lo te chu kawtthlerah an lungawi lohna lantir lo a, an duh a nih chuan court lamah kal zawk mai turin a chah nghal bawk.

President thlan thar Buhari chuan theihtawp chhuahin an ram tan a thawk dawn tih a sawi a, hemi rual hian thil mak a ti thei lo tih a sawi nghal bawk. Nigeria mipui, maktaduai 173 zinga a tam zawk an dinhmun a harsa a, hetihlai hian Boko Haram helpawlte'n pawikhawihna an thlen reng bawk a ni.

Buhari chuan midangte entawn turin amah ngeiin hma a la dawn tih sawiin, eirukna umbo tuma a beih tur thu a sawi.

Nigeria President thar

Muhammadu Buhari :

Kum 72

Nigeria hmarlama cheng niin Muslim a ni

Kum 1984-1985 khan Nigeria-a sipai rorelnaah a hotu a ni

Sipai chakna hmang veka paih­thlak a ni

Eirukna laka fihlima ngaih a ni

Mi invawng fel leh inthunun ṭha tak a nia, a hun taka thleng hman lo sorkar hnathawkte chu uṭawk sawtin a sawt tir thin

Boko Haram helte'n thah tuma an beihna lak aṭangin him takin a chhuak