Kenya-a Garissa University beihnaah mi 147 thi

Kenya hmarchhak lama Ga­ris­sa University chu Ningani zing khan al-Shabab helte'n ralthuam nen an bei a, mi 14 an thi.

Helho hian University security guard pahnih an kahhlum hnuah, zirlaite an pawng kah a ni. Pawikhawihtu zinga pali chu dormitory-a thihchilh bomb an pai a puah avangin an thi bawk. Tun ṭum hi nikhat thil thua al-Shabab te'n civil mi an beihna rapthlak ber a ni.

Pawikhawihna thleng mita hmutute chuan helho hian zirlaite zinga Christian-te chu thlang chhuakin an kap ta niin an sawi. Zirlai 500 chuang chu an tlan­chhuak hman a, an zinga 79 velin hliam an tuar a ni. He thil thleng vang hian Garissa leh hmar­chhaka khawpui dang pathum-ah curfew puan nghal a ni.

UN Secretary General Ban Ki-moon chuan helho pawikhawihna rapthlak tak chu a dem thu sawiin, firfiaka chetna leh pawikhawihna do let turin UN chuan Kenya puih a inhuam reng a ni, a ti.

US pawhin al-Shabab helho beihletna kawngah Kenya chu puih a inhuam tih a hrilh bawk.

Kenya sorkar chuan university beihnaa a phusa ber chu al-Shabab official zinga mi, Mohamed Kuno a ni tih a sawi. Kuno hi Garissa-ah hian Islamic School headmaster a ni ṭhin a, kum 2007 khan a bang a ni.