Iran nuclear talk-ah inremna an siam thei ta

Hun rei tak chhung Iran nuclear program chung­changah ram thiltithei paruk, P5+1 leh Iran ram aiawhte'n inbiakna an neih hnuin, Ningani khan inremna tluantling siam theihna tur an duang thei ta.

Switzerland-ah ni riat chhung inbiakna an neih hnuin, Iran nuclear program kalpui mek tihtawpna tura inremna siamna tur hi an duang thei a, June 30 hian thutlukna tawp siam an tum a ni. Inremna puitling siam a nih hma chuan khawthlang ramte'n Iran an hrekna chu kalpui zel a la ni ang.

Inremna siam remtih a nih tak avang hian Iran khawpui, Tehran-ah chuan mipui tam takin kawtthlerah an lawm a, an ram President Hassan Rouhani an fakna thute an aupui a ni. US President Barack Obama pawhin inremna an siam thei ta chu lawmawm a tih thu sawiin, thil chhin­chhiahtlak a ni, a ti. Iran nena inremna an siam tur chu US sorkar-in nuclear ralthuam khuah­khirhna tura Soviet Union inremna a lo siampui tawh nen a tehkhin hial a ni.

Inremna tur an duan hi siamṭhat tur tam tak a la awm dawn a, expert-te chuan June 30-a inremna puitling siam a nih hma pawhin a kar lakah hian harsatna pawh a thleng thut thei niin an sawi.

Hetihlai hian US ṭhian­ṭha, Israel chuan Iran nuclear deal siam hi nasa takin a sawisel a, Iran inremna siampui hi Israel himna atan a hlauhthawnawm thei a ni, a ti. Israel President Benjamin Netanyahu chuan inremna an siampui hian Iran-in bomb a siam­na kawng a dang dawn lo a, kawng a hawnsak zawk mai dawn nia a lan thu a sawi.