A kawr hak vangin Bolivia minister ban a ni

Bolivia President Evo Morales chuan a Defence MInister Jorge Ledezma chu an ṭhenawm, Chile ram a tlawh ṭuma a kawr hak avangin minister a nihna aṭangin a ban.

Jorge Ledezma hian tunkar tir lam khan Chile rama tuilian tuarte tana tui thianghlim in tur semin a, hemi ṭum hian a karah hian kum zabi 19 hunlaia Bolivia-in Chile laka a ram a hloh tawh, tuipui kam chu Bolivia ram a la nihzia lantirna, logo chuang kawr a ha a ni. A kawrah hian 'Tuipui hi Bolivia ta a ni' tih leh, ram an inchuh lai Bolivia flag rawng anga cheina map chuang a ha a ni.

Ledezma chuan ram pahnihte inkar boruak tihchhiat tuma thilti a nih loh thu leh, a vawt a tih avanga a kawr chu ha mai a nih thu a sawi. A hma pawhin he kawr hi a lo ha fo tawh niin a sawi.

Chile Foreign Minister Heradlo Munoz chuan an ramin tuilian vanga chhiatna an tawha Bolivia-in a puihna chu lawmawm a tih thu a sawi a, hemi rual hian an puihna chu politics lama hlawk tumna atana hman tur a ni lo, a ti.

Bolivia President Morales chuan minister kawr hak chungchangah Chile hnenah hian ngaihdam a dil tawh bawk.