Yemen-in zirlai thite hriatrengna hun a hmang

Somalia helpawl, al-Shabab te'n Kenya rama Garissa University an beih avanga thi chu mi 148 an tling tawh a, nimin khan Kenya ram chuan helho kuta thite pual hian Easter Sunday prayer service neih ṭhin chu a hlan. Sorkar chuan nimin aṭanga ṭanin, ni thum chhung rampum huap­in sun an nih tur thu a puang bawk.

Nimina Easter Sunday lawmna inkhawm, Kenya ramchhung hmun hrang hranga neihah chuan helhoin an beih avanga zirlai leh security force thite hriatrengna hun hi an hmang a, hnam puanzar te pawh a ngul chanve-ah zar an ni. Kenya ram mipui 80% hi Kristian an ni.

Kar kalta Ningani khan Kenya hmarchhak lama Garissa khuaah Islam firfiakte hian University hi luhkhungin, muslim ni lo zirlaite chu thliar hrangin rawng takin an tihlum a ni. Kenya President Uhuri Kenyatta chuan pawikhawihtute chu ngaih­tuahna fim pawh nei lo mi nunrawng an ni tiin, an pawikhawihna avang hian na taka beih let an ni dawn a ni, a ti.

Ningania Kenya ram beih hi kum 1998-a Nairobi-a US embassy bomb a nih hnuah pawikhawihna thleng rapthlak ber a la ni.

Inrinni khan al-Shabab te hian vauna tihchhuakin, Kenya chuan Somalia rama sorkar sipaite pui tura a sipai dahte a lakchhuah loh chuan an ramah thisen chhuahna nasa zawk a la thleng ang, tiin an sawi a ni.

Al-Shabab te'n vauna an tih­chhuah hnu lawk hian Garissa police-te chuan university beitu firfiak zinga mi pali an kahhlumte ruang chu truck hmangin kawtthler an fanpui a, mipui tam takin an zui bawk. Police-te chuan mipui zingah a hria an lo awm takin tia kawngzawhpui an nih tih an sawi a, mahse mipuite'n lung in ruang an phurh hi an lo tawng a, ṭhenkhatin an lo au khum bawk.