US-a state chanve dawnah Covid-19 hri kai thar an pung
Johns Hopkins University tarlan danin Pathianni liam ta khan US-a state 21-ah Covid-19 hri kai thar chu a hma kara kai thar aiin 10%-in a tam a, hei vang hian health expert-te chuan thlasik lo thleng turah hian US-a hri kai zat chu an pun belh leh hle an rin thu an tarlang.
State 21 zingah Alabama, Alaska, Nevada, New Jersey, Oregon, South Carolina leh Wyoming state-ah hri kai thar hi an pung nasa zual a ni. State pariatah chuan hri kai thar pun dan hi a la ngai a, state 11-ah chuan hri kai thar hi a hma kar aiin a tlahniam thung a, chung state zingah chuan Arizona, Louisiana, Tennessee leh New Hampshire state an tel.
University of Washington-a Institute for Health Metrics and Evaluation (IHME) chuan thlasikah US-a Covid-19 hri kai chu an pun belh an rin thu an tarlang a, December thlaah phei chuan he hri vanga US-a thi hi nitin mi 3000 an awm an rin thu an sawi. Nakkum January 1-ah chuan US-a Covid-19 vanga thi hi mi 3,71,000 an tlin chhoh theih an rin thu IHME chuan an tarlang bawk a ni.
IHME chuan US mipuiten hri laka invenna tur pawimawh nia sawi, hmaituamna an hman ṭhat peih loh vangte leh sorkarin kaihhruaina dan a siamte an zawm ṭhat tawk loh vangin, hri kai hi an la pung zel dawn niin a sawi.
US Centers for Disease Control and Prevention director Robert Redfield chuan, "Kan inthlahdah chuan thlasik lo awm tur hi America mite tana public health lama lungchhiat thlak ber hun a ni thei dawn a ni,"a ti.
White House Coronavirus Task Force member zinga mi pawimawh tak US National Institute of Allergy and Infectious Diseases-a director Anthony Fauci chuan nitina US-a hri kai thar chu chawhrualin mi 40,000 ang zel a nih thu a sawi a, nakkum kum tawp hma chuan Covid-19 hri len hmaa nundan pangngai ang kha a thlen theih a la rinawm loh thu a sawi.
US-a Covid-19 hri kai hmuh chhuah tawh hi mi 73,61,633 an tling tawh a, heng zinga 46,09,636 an dam leh tawh a ni. US hi hri kai tam berna ram a la nih bakah he hri vanga thi tam berna a la ni chhunzawm zel a, nimin thleng khan he hri vanga thi hi mi 2,09,808 an awm tawh a ni.