Palestine-in Arab League chairman nihna bansan

Palestine chuan Arab ram ṭhenkhat Israel ram nena inkungkaihna siam a, inremna an ziah duh lohna lantirin  Arab League chairman a nihna aṭangin a bang. Tun hnaiah Arab ram pahnih, United Arab Emirates (UAE) leh Bahrain chuan US hmalakna hnuaiah Israel nena thawhdunna tur inremna an siam a, hei hi Palestinian-ten an duh lo hle. UAE leh Bahrain chu Israel-in Palestinian-te ram a luahsaka Palestinian ram hran dinna tura hma an lak mekna phatsanah an puh a ni.

Tunthla tir lam khan Palestinian-te chuan Arab League hnenah Israel nena inzawmna siam Arab ramte demna thuchhuah siam turin a lo phut tawh a, mahse an thil phut hi tihpuitlin sak a ni lo thung. 

Palestine hi thla ruk chhung atan Arab League meeting chairman tur a ni a, mahse West Bank-a Ramallah khuaa news conferences a neihah, foreign minister Riyad al-Maliki chuan he dinhmun chelh pawh hi an duh lo tih a sawi.