Palestinian-in Israel chhiah pek tum pawm lo

Palestinian President Mahmoud Abbas chuan Israel-in Palestinian tana chhiah a khawnsak ṭhin pek a tum chu a vaia pe lo a, a ṭhen azar chauh pek a tum avangin an pawm lo tih a sawi.

Israel hian Palestinian hnena chhiah pek a tum hi thla thum zet a hren sak tawh a, hemi hnu hian a pawisa pek tur aṭang hian Palestinian-in leiba a neihte chu a laksak a, a bak chu a thawn a ni.

Abbas chuan, "Israel hian chhiah min lakkhawmsak chu a rawn thawn tih a sawi a, mahse an rawn thawn chuan kan sum hmuh tur aṭanga hmun thuma ṭhena hmun khat zet an lo la hek a ni. Hei vang hian kan pawm thei lo a, pawisa pawh hi kan thawn let leh nghal a ni," a ti.

Israel leh Palestinian-te'n inremnna an kalpui mek hnuaiah, Israel hian Palestinian te tan hian chhiah leh custom fee a khawnsak a, heng sumte hi Abbas-a kaihhruai, Palestinian Authority sorkar hnenah a thawn leh ṭhin.

Palestinian official-te chuan thla thum chhung an chhiah dawn tur hreksak an nih avang hian Israel hian dollar maktaduai 450 pek tur a nei tawh tih an sawi. Hetihlai hian Palestinian lam hian Israel lakah leiba eng emaw zat a nei ve bawk.

President Abbas chuan an sum dawn tur hi a vaia an dawng lo a nih chuan ICC ah an zualko dawn tih a sawi. Hetihlai hian Israel Prime Minister office chuan Palestinian Authority-te'n sum hi an dawn duh hun hunah an thawn nawn leh nghal tur thu a sawi thung.