Bangladesh-a thlipui tleh vangin mi 30 an thi

Bangladesh hmarlamah thlipui a tleh avangin mi 30 an thi a, mi dang tam takin hliam an tuar bawk.

Kar kalta Inrinni zan khan hmarlama Bogra district-ah thlipui na tak hi a thawk a, darkar chanve vel zet a tleh a ni. District administration chief, Md Shafiqur Rahman chuan an district-a thlipui tleh vang hian mi 17 an thi a, midang 85 in hliam an tuar tih a sawi. Thi zinga a tam zawk hi an chenna in chimin a delh hlumte leh, electric ban tluk vanga current-in a mante an ni.

Naogaon, Natore leh Pabna district-ah pawh thlipui tleh vang hian mi 13 an thi bawk.

Thlipui tleh hian thingkung tam tak a chhem tlu a, chenna in eng emaw zat a chhe bawk.