Yemen-ah Red Cross-te an luh phalsak

Tualchhung indo thlen mekna, Yemen ramah chuan indo avanga harsatna tawkte chhawmdawl hna thawk turin International Committee of the Red Cross (ICRC) chu an luh phalsak a ni.

Red Cross hi Yemen khawpui, Sanaa-ah thlawhtheihna pa­hnihna an thawn luh phalsak a ni a, heng thlawhtheihnaa hian damdawi lam mithiamte leh damdawite phurh luh an ni ang.

Yemen khawpui thununtu, Houthi helho lakah Saudi Arabia kaihhruai Arab ram ṭang­rualte chuan beihpui an thlak mek a, zan 12 an inbei tawh a ni. Sanaa khawpui bakah chhim lama lawngchawlh hmun pawi­mawh, Aden khuaah pawh sorkar sipai leh Houthi helte hi an inbei nasa hle.

United Nations (UN) chuan kar hnih kalta chhung khan Yemen rama inbeihna thleng vang hian mi 500 chuang an thi tawh tih a sawi. ICRC chuan civil mite tawrhna thleng zel tur titawp tur chuan sorkar leh helpawlte'n inkahhai an puan a ngai tawh a ni, a ti.

ICRC thupuangtu Marie Claire Feghali chuan khawpui chhung mipuite dinhmun chu a chhe tawh hle tih a sawi a, "Ei tur lei turin an chhuak thei tawh lo a, tui thianghlim a vang tawh a, tui pekchhuahna pipe pawh an kap chhe bawk a ni. Kan theihtawp chhuah mah ila an dinhmun a ṭha lo hle a ni," a ti.

Houthi helhoin an tum ber chu President Hadi-a kaihhruai sorkar paihhlak a ni a, an ram khawpui Sanaa hi helpawlte thununna hnuaiah a awm tawh avangin President pawh hi himna zawngin Saudi Arabia-ah a tlanchhe tawh a ni.