Kenya-in Garissa University beitu lu man a phal sang

Kenya Interior Ministry chuan kar kaltaa an ram hmarchhak lama Garissa University beih anih ṭum a ruahmantu ber, al-Shabab commander lu manah Kenyan shilling maktaduai 20 a phal thu nimin khan a puang.

Kar kalta Ningani khan Somalia helpawl, al-Shabab chuan Garissa University hi luhkhungin darkar 16 chhung zet an bei a, mi 148 in an thihphah tawh a ni.

Interior Ministry chuan university campus beihna tura a ruahmantu leh bul tumtu ber chu al-Shabab commander Mohamed Mohamud, Gamadhere tia hriat bawk a nih thu a sawi. Gamadhere chu Kenya-in firfiak man tura a duh ber a nih thu sawiin, a lu manah Kenyan shilling maktaduai 20 phal a nih thu hi a sawi a ni. Hei hi dollar 215,000 hu vel a ni.

University beitu fir­fiak zingah hian Kenya official, Mandera chief fapa a tel niin interior ministry thupuangtu chuan a sawi. Mandera chief fapa, Abdirahim Abdullahi hi University of Nairobi aṭanga law graduate a ni a, kum 2013 khan tlanboin Somalia-a al-Shabab pawl hi a zawm ta nia a rin thu a pa chuan a sawi.