Vietnam-a thlipui tleh vanga thi mi 59 tling tawh

Vietnam rama typhoon Yagi tleh leh ruah sur nasa takin chhiatna a thlennaa thi chu nimin, September 9 thleng khan mi 59 an tling tawh.

Nimin zing khan Cao Bang province-ah mi 20 chuanna bus chu leiminin a hnawl hnuah tuilianin a la zui a, chhanchhah hna thawktute tirh ni mah se leimin avangin hna an thawk chak thei lo a ni. Phu Tho province-ah Red River-a thir lei chu nimi zing khan a chim bawk a, car 10 leh truck pakhat bakah motorcycle pahnih chu luiah an tla a ni. Lui aṭang hian mi pathum chhanchhuah a ni a, mi dang 13 te erawh an chin hriat a ni lo.

Typhoon Yagi hi kum tam tak hnuah Vietnam ramin thlipui tleh a tawrh nat ber niin, kar liam ta Inrinni khan Vietnam hmarchhak lam chu 149 kph (92 mph) a nain a nuai a ni. Thlipui hian ruah a keng tel bawk a, thli tleh hi reh tawh mah se ruah a la sur chhunzawm dawn niin meteorological agency chuan an sawi a, hei hian tuilian leh leimin a thlen chhunzawm a la hlauhthawnawm hle.

Thlipui tleh vang hian Vietnam hmar lamah chenna in 3,300 vel leh, ram hectare 120,000-a zaua thlai chinte an chhia niin thuneitute chuan an sawi. Vietnam a thlen hmain typhoon Yagi hian China chhim lam leh Philipines ram a nuai bawk a, mi 24 thiin hliam tuar eng emaw zat an awm a ni.