Yemen-a inbeihnaah mi 140 chuang an thi
Yemen rama Houthi hel leh sorkar sipaite inbeihnaah mi 140 chuang an thih belh leh a, hetihlai hian indona avanga harsatna tawk mekte hnena Red Cross-in chhawmdawlna pek a tum chu tihkhawtlai.
Saudi Arabia kaihhruaiin Arab ramte chuan Yemen sorkar puiin helho lakah hian beihpui a thlak chhunzawm mek bawk.
Thawhṭanni khan chhim lama khawpui pawimawh, Aden-ah Houthi hel leh President Abedrabbo Mansour Hadi thlawptu sipaite an inbei leh a, darkar 24 chhungin mi 140 chuang an thi a ni. An zinga 53 hi helhoin khawpui-a lawngchawlhna hmun lak an tumnaa an thahte an ni.
UN-in Yemen ram hruaitua a pawm, President Hadi hi helhoin an ram khawpui, Sanaa an lak hnuah himna zawngin a tlanchhia a, tunah hian Saudi Arabia ramah a awm mek a ni.
Tualchhung indona thleng vang hian mipuite harsatna an tawk mek a, hei vang hian Red Cross chuan mipuite chhawmdawl hna thawh phalsak tura a ngen hnuah, Red Cross thlawhtheihna pahnih chu Sanaa-ah an luh phalsak an ni a, mahse a ṭumna lamah harsatna a awm avangin an la tir thei rih lo niin an sawi. Red Cross hian damdawi lam thiamte bakah damdawi eng emaw zat thawn luh an tum.
International Committee of the Red Cross thupuangtu, Sitara Jabeen chuan thlawhtheihna luh phalsak ni mah se, a ṭumna lamah harsatna a la awm niin a sawi. Yemen tualchhung buaina thlen hnu hian thlawhtheihna lut pawh an tlem tawh hle tih a sawi. Hetihlai hian Saudi kaihhruai ṭangrual pawl chuan Red Cross hian Sanaa airport aṭangin a staff member 11 a hruaichhuak niin a sawi thung.