Turkey-in social media khuahkhirhna a titawp
Turkey sorkar chuan social media, Facebook leh Twitter a block chu a titawp a, YouTube khuahkhirhna pawh tihtawp tir tuma inbiakna neih mek a ni.
Helhoin prosecutor man a, a lu-a silaia an tin lai thlalak an tihlante lathla tura Turkey sorkar ngenna social media site-te'n an pawm hnuah, Turkey court chuan an website khuahkhirhna hi a titawp ta a ni.
Kar hmasa khan helhoin Istanbul prosecutor, Mehmet Selim Kiraz an man chu a lu-a silaia an tin lai thlalak an tidarh a, Kiraz hi police-te'n chhanchhuah tumin bei mah se, helho nena an inkahnaah a thi a ni.
Sorkar chuan prosecutor thlalak lanna kaihhnawih website-te chu a kharsak nghal vek a ni. Thawhṭanni khan Google pawh prosecutor thah a nih dan kaihhnawih thu a dahte a tihbo loh chuan block a nih tur thu court chuan a hriattir bawk.
Prime Minister Recep Tayyip Erdogan chhungte eiruknaa an inhnamhnawih dan audio recording thehdarh a nih vangin kum 2014 inthlanpui neih dawn khan Turkey chuan Twitter leh YouTube te a lo block tawh bawk.