UN-in Damascus-a Palestinian camp enfiah a dil

Islamic State (IS) firfiakte'n Syria khawpui, Damascus khaw dai Yarmouk-a Palestinian refugee camp a beih avangin camp-a awmte dinhmun a chhe hle a, UN Security Council chuan raltlante dinhmun enfiah a dil mek.

UN official chuan Yarmouk camp-a awmte dinhmun hi sawi phak lo khawpa chhia a ni, a ti. Member 15 awmna Security Council chairman, Jordan ambassador Dina Kawar chuan civil mite chu venghim a, an himna tura a theih anga puih an ngai takzet a ni, a ti.

Council hnena report pe tu, Palestinian Unwra relief agency hotu Pierre Krahenbuhl chuan camp chhung dinhmun chu a chhe tak zet tawh a ni, a ti. Refugee camp zinga 90% chu IS kutah hian an awm tawh a ni.

Palestinian UN ambassador, Riyad Mansour chuan raltlante chhanchhuah chu an hna pui ber tur a ni tih sawiin, member ram dangte chu Syria ramchhung hmun dangah emaw, ram dangah emaw Yarmouk camp-a raltlan awmte sawnchhuah dan ngaihtuah pui turin a sawm nghal bawk.

Unwra official Chris Gunness chuan April 1 aṭang IS te'n an beih hnuah, Yarmouk camp-ah hian chaw ei tur, tui thianghlim in tur leh damdawi-te an tlachham ṭan tawh a ni. Kawtthlerah an inbeih reng avangin mi tam takin an in an chhuahsan ngam lo a, bomb pawh a puak reng bawk a ni. He thil hi tihtawp a, civil mite chu hmun him lama lakchhuah an ngai a ni, a ti.

Yarmouk camp hi kum 1948-a Arab-Israel indo laia Palestinian raltlante tana siam a ni. Syria tualchhung indona a thlen hma chuan raltlan 150,000 vel an khawsa tawh a, mosque, school leh public building te pawh a awm vek a ni.