Yemen-ah hel leh sorkar an inbei chhunzawm zel

Yemen-ah Houthi hel leh sorkar thlawptu sipaite an inbeih chhunzawm zel a, Thawhlehni khan mi 100 dawn an thih belh leh.

Houthi helte hian an ram khawpui, Sanaa an la tawh a, chhim lam khawpui, Aden-a lawngchawlh hmun pawimawh lak leh tumin an bei mek a ni. Aden-a an inbeihnaa thi zingah hian civil mi 17 an tel.

Yemen tualchhung indona thleng vang hian civil mite'n harsatna nasa tak an tawk mek a, indona tuartute chhawmdawl leh ṭanpui hna thawh a nih theihna atan Red Cross chuan pawl hnihte chu inkahhai puang turin a ngen. Sanaa khawpuiah Red Cross-te hi an luh phalsak ni mah se an luh theih hun tur tihkhawtlai sak leh an ni.

Yemen President Abedrabbo Mansour Hadi-a'n a ngen angin Saudi Arabia kaihhruaiin Arab ramte chuan Houthi lakah hian kar hnih dawn beihpui a thlak tawh a, hetihlai hian helpawlte hi Iran-in a pui thung nia sawi a ni.

International Committee on the Red Cross thupuangtu Marie Claire Feghali chuan Yemen ram mipuite dinhmun chu a chhe hle tih sawiin, kawtthler tinte chu en hrehawm khawpin an dinhmun a chhe tawh a ni, a ti. Mi tam tak chuan himna zawngin tlanchhiat duh mah se an tlanchhuak thei lo tih a sawi.

United Nations chuan March 26-a ṭangrual pawlte'n beihpui an thlak aṭang khan helpawl leh sorkar lam thlawptute inbeihnaa thi chu mi 74 an tling tawh tih a sawi. Mi 100,000 chuang awmna mumal nei loin an awm mek bawk.

Chhawmdawl hna thawktu, Doctors Without Borders (MSF) pawhin Yemen ram dinhmun chu nitinin a chhe zel a ni, a ti. MSF hian Aden hospital-ah staff 140 a dah mek a ni.