Security ṭha zawk phutin Kenya mite'n kawng an zawh

Somalia helpawl, Al-Shabab te'n Kenya rama Garissa University luhkhung an beih avangin mi 148 an thi a, he thil thleng vang hian Kenya khawpui Nairobi leh Garissa khuaah mipuite'n security ṭha zawk phutin kawng an zawh.

Kenya sorkar chuan rampum huapin mitthite hi ni thum chhung sun an nih tur thu a lo puang tawh a ni.

Nairobi-a kawngzawhte chuan pangpar leh bati-te kengin, thi te hriat­renga puala kros siam hma­ah an dah a ni. Firfiak­te kuta thite hming hi chhiar chhuah a ni bawk.

Security force-te chuan university beitute hi chhui zui mek a ni. Kawng­zawhte chuan pawi­khawihtute zawn­chhuahna kawngah sorkar chu a che chak tawk lo nia an ngaih thu an sawi.

Al-Shabab te hian university an beih hian zirlai zinga muslim ni lote tihhlum turin an thliar hrang a, an pawng kah a ni.

Kenya sorkar chuan al-Shabab pawl pui ṭhin nia rinhlelh mi 86 te account chu khawih chet theih lohin a dahsak tawh a, hei bakah hian informal money transfer service, ha­walas 13 a kharsak bawk. Helpawl hnena ral­thuam supply-tu nia rin­hlelh, Kenya mi panga man an ni tawh bawk.