A thubuai ngaihtuah hmain France mayor hlui a intihlum

France rama Tours city mayor hlui, Jean Germain chu dawt hmanga thilti leh, public fund tichingpena puh a nihna thubuai ngaihtuah a nih hmain a intihlum.

Jean Germani hi kum 67 mi, Socialist Senator a ni. Kum 1995-2014 khan Tours mayor hna hi a lo thawk tawh a ni. Dik lo taka thilti leh, public fund tichingpena puhna thubuai hi nimin zing khan ngaihtuah a ni dawn a, mahse a thubuai ngaihtuah anih hma hian amah a intihlum ta a ni.

Germain hi a cabinet member pakhat, France leh China inlaichinna ṭha zawk siam a nih theihna atana hma latu chu khawpui chhungah Chinese Wedding lem a siam tir niin an puh bawk.

Taiwan mi, Lise Han-i chu Germain-a councilor a nih laiin ama company, Blue Lotus tan public contract a pe nia hriat a ni a, he company hian China mi, innei thar hlimte chu Tours-ah inneih lawmna lem a siamsak a ni. Kum 2007 leh 2011 inkar khan China mi tuak 200 chuang zet chu Tours-ah hian an innei ṭha leh a, he scheme hmang hian Han hian sum tam tham tak a lalut a ni.

Thubuai ngaihtuahnaah hian Germain hi a inlan lo a, a car-ah lehkha hnutchhiahin a chenna in bulah a ruang hi hmuh a ni. Germain chuan khawpui sum pakhat pawh a tih­chingpen loh thu leh, Tours mipuite tana ṭha tura theihtawp a chhuah thu te, amah an puhna chu politics-a an beihna nia a rin thute a ziak a ni.