Activist-te'n 'The Interview' DVD North Korea-ah an thawn lut

North Korea ram hotu, Kim Jong-un chanchin, fiamthu lam hawia film-a an siam 'The Interview' chu NKorea ram chhungah lakluh khap a ni a, heti chung hian South Korea activist-te chuan he film DVD hi balloon hmangin copy eng emaw zat NKorea-ah an thawn lut.

'The Interview' ah hian CIA in NKorea hotu, Kim Jong-un thah tuma an phiar dan, fiamthu lam hawia tihlan a ni a, hei hian NKorea a tithin­ur hle. He film siamtu, Sony film chu hack a nih bakah, a film tihchhuahna cinema hall-te beih tuma vauna pawh a tawk a ni. FBI chuan Sony film vautu hi NKorea lam niin a sawi a, mahse hei hi anni chuan an pha thung.

SKorea activist, Lee Min-book chuan January thla aṭang khan, ṭum li chu DVD awmna balloon hi ramri aṭangin NKorea lamah an chhuah tawh tih a sawi a, DVD bakah hian US dollar leh Kim Jong-un kaihhruai sorkar sawiselna thuziakte pawh an telh a ni.

Hetihlai hian NKorea sorkar chuan The Interview film hi en a khap tlat a, DVD player nei, he film lo en te chu man an nih chuan prison camp-ah hun rei tak chhung tantir theih an nih tur thu a tarlang.