Israel-in Gaza a beihnaah mi 40 an thi

Hamas Civil Defence authority chuan Israel sipaiten Thawhṭanni zan khan Gaza Strip chhim lama humanitarian zone chu thlawhtheihna hmanga beiin, mi 40 an thi niin an sawi. Hetih lai hian Israel chuan Khan Younis-a Hamas firfiakte operation centre an beih thu a sawi thung a, civil mite tawrhna thlen tlem thei ang ber turin an che tih an tarlang.

Israel sipaite hian indona avanga tlanchhia, Khan Younis khawthlang lam, al-Mawasi-a humanitarian zone-a awmte puan-in chu an bomb niin Hamas lam chuan a sawi a, mi 40 an thih bakah hliam tuar 60 chuang an awm niin an sawi. Israel sipaite airstrike vang hian hmun thumah lei chu meter sarih vel zeta thukin a khuar a, puanin pawh 20 chuang an chhilh niin inbeihna thlenna bula volunteer pakhat chuan a sawi.

Mahse Israel Defence Force (IDF) thupuangtu chuan sipaite hian Khan Yunis-a Humanitarian Area chhunga Hamas firfiak control center chu an bei tih sawiin, beihpui thlak hma hian civil miten an tawrh lohna turin hma lak a ni a, boruak aṭangin an awm dante pawh thlithlai hmasak vek a ni, a ti. Gaza Strip-a firfiak pawlte hian civil mite leh humanitarian infrastructure-te chu an ngai pawimawh lo a, Humanitarian Area-a puan pawh engah mah ngai loin, heng hmunte hi Israel ram leh Israel sipaite beihna remchang atan an hmang zawk a ni, tiin a sawi.

Hamas chuan IDF thupuangtu thusawi hi an hnawl a, humanitarian area-a Hamas mi leh sate awm nia an puhna chu thu dik lo a ni, a ti ve thung.

Israel-in Hamas firfiakten an ram an beihna chhang let a, nikum October thla aṭanga Gaza Strip-a beihpui a thlak hnuah khan Palestinian mi tam tak chu Khan Younis-ah hian an tlan chhia a ni.