NKorea-in nuclear ralthuam tihpun a tum

North Korea ram hruaitu, Kim Jong-un chuan nuclear ralthuam tihpunna turin an ram chuan nuclear force construction policy a hmang chho dawn tiin a sawi.

State KCNA chuan nimin khan hemi chungchang hi tarlangin, Thawhṭannia NKorea founding anniversary an hmannaa thu a sawiah, Kim chuan a sawi chhuak a ni, a ti. NKorea chuan nuclear lama theihna a neihte chu, an ram himna turin a ṭul a nih chuan eng hun pawha hmang turin a inpeih a ngai a ni, a ti. US leh a ṭhuihruaite vauna lo hmachhawn tur pawhin sipai chak tak neih reng a ṭul thu Kim chuan a sawi bawk.

Kim hian Thawhṭanni khan military accademy pawh a tlawh a ni. An ram din champha an lawmnaah hian thil lian tham puanzar nei lo mah se, thlalak aṭanga a lan danin ralthuam an pho lan zingah hian 12-axle missile launch a tel nia hriat a ni a, hei hi a dik a nih chuan NKorea hian intercontinental ballistic missile lian zawk a siam chho leh nia rin a ni.

Kum 2022 aṭangin NKorea hian ralthuam a enchhin fo a, a bikin long-range nuclear missile lam a thlurbing deuh bik a ni. Zirchiangtu ṭhenkhat chuan NKorea hian hmun hla zawk kap thei tur missile siam kawngah hian harsatna la nei mah se, an ṭhenawm rama an target te fuh thei tur missile erawh a neih ṭhat tawk tawh an ring thung.