Germany-in khawmual ramriah khuahkhirhna siam

Germany chuan dan loa pem lutte leh, Islamic firfiak leh an ram himna tichhe thei turte venna atan khawmual lama an ramri pakuate chu khauh zawka khuahkhirh a tum.

Interior minister Nancy Faeser chuan France, Luxembourg, Netherlands, Belgium leh Denmark nena an inrinaah te khuahkhirhna a siam thla ruk chhung atan a kalpui ve leh dawn tih a sawi. Nikum khan Austria, Poland, Czech Republic leh Switzerland-a an inrinaah te khuahkhirhna khauh zawk hi a lo siam tawh bawk a ni.

Minister chuan ramri-ah hian ram dang aṭanga pem luh tumte lo dang a, lo hnar nghal theihna turin mawhphurtute hnena thuneihna pekna tur pawh sorkar chuan a duang mek tih a sawi a, mahse eng ang takin nge siam a nih dawn erawh a sawilang lo.

Kum 2023-a Germany-in ramri ṭhenkhata khuahkhirhna a siam aṭang khan an rama luh tum mi 30,000 vel chu dan an lo ni tawh a, ramri dangah khuahkhirhna kenkawh a nih ve leh dawn avangin ram dang mi an lo dan pawh hi an pung chhoh a rinawm.

Germany ram ṭhenawmte chuan he ruahmanna siam hi an sawisel a, Austria interior minister Gerhard Karner chuan Germany-in lo dante chu an ramah an luh an phalsak dawn bik lo tih a sawi ve nghal bawk.