Australia-in naupangte social media hman khap dawn

Australia sorkar chuan social media-in naupangah taksa leh rilru lamah nghawng ṭha lo tak a nei ṭhin tih sawiin, naupangin social media an hman a khap dawn.

Prime mininister Anthony Albanese-in sorkar chuan he khapna dan siamna tur hian kum bithliah tur chin a zirchiang dawn tih a sawi, kum bithliah tur hian kum 14 leh 16 te ngaihtuah chhin a nih thu a sawi bawk.

"Nu leh pate rilru chu an fate social media hman nasat chuan a tihrehawm tawh a, phone hmang lo turin an duh a, kei ngei pawhin ka duh a ni," tiin PM chuan a sawi. Eptu hruaitu Peter Dutton pawhin a hmain social media chu kum 16 hnuai lam tana khap a duh thu a lo sawi ve tawh bawk a ni.

China, France leh US-a state ṭhenkhat chuan naupangten social media an hman theih lohna turin dan an lo pass tawh a, cyberbullying a nasat bakah beauty standards dik lo tak tak thlengin naupangte rilruah a tuh tih an sawi.

Hetih lai hian ṭhenkhat chuan naupangte hman khapsak hi an sawisel thung a, digital world-ah thil ṭha leh ṭangkai tam tak a awm a, hengte hi naupangte hian an hre thei dawn lo a, an quality thlengin a tihhniam phah thei niin an sawi ve thung.