2013-a Boston bomb-tu thiam loh chantir
Kum 2013-a Boston Marathon neihna hmuna bomb tipuaktu, kum 21 mi Dzokhar Tsarnaev chu a thubuai 30-ah thiam loh chantir vek a ni. A thubuai zingah hian bomb tihpuah bakah amah um zuitu police officer a kahhlum thubuai pawh a tel.
US citizen, Kyrgyzstan-apiang, Dzhokhar Tsarnaev hi thiam loh chantir ni mah se, a hremna erawh puan a la ni lo. A thubuai 30 zinga 17-ah thi tura hremna thlenga pek theih a ni. A hremna tur hi Jury-in an la ngaihtuah leh ang.
Kum 2013, April 15 khan Boston Marathon neihna hmuna finishing line bul, mipui awm tamna laiah Tsarnaev leh a u, Tamerlan Tsarnaev-te chuan ṭum hnih bomb an tipuak a, mi pathum thiin mi dang 264 in hliam an tuar. Police-te nen an inbeihnaah Tamerlan Tsarnaev hi kahhlum a ni a, Dzokhar chu man a ni ta a ni. Pawikhawihna a thlen lai hian Dzokhar hi kum 19 mi a ni.
Boston Mayor Martin Walsh chuan, "Court rorelna hian kum 2013-a Boston Marathon-a pawikhawihna rapthlak tak tuartu chhungte rilru na chu tlem tala a chhawk theih ka beisei a ni," a ti.
March 4 aṭang khan Dzokhar thubuai hi ngaihtuah a ni a, an puhnaah a fihlim niin insawi mah se, a thubuai ngaihtuah chhung hian prosecutor lam chuan thuhretu 92 koin, defence lam hian 4 chauh an ko a ni.