Yemen-a inbeihna hmun, Aden-ah chhawmdawlna thawn luh a ni tawh

Yemen chhim lam khawpui pawimawh, Aden-ah Houthi hel leh sorkar thlawptu lamte an inbei mek a, hetihlai hian indona tuartu mipuite chhawmdawlna tur chu Aden lawng­­chawlhna hmun thlenpui a ni tawh.

International Committee of the Red Cross chuan Nilaini khan damdawi, ton 2.5 phurtu lawng chuan Aden a thleng tih a sawi a, hei hi Yemen tualchhung indona thlen hnua chhawmdawlna thawn luh hmasa ber a ni. Red Cross chuan damdawi thawn luh rual hian surgical team pawhin Aden hi an thleng ve nghal tih a sawi.

ICRC thupuangtu chuan Yemen tualchhung dinhmun chu a chhe takzet tawh nin a sawi a, "Dawr khar vek a ni a, mipuite'n ei tur leh mamawh dang lakna tur an hre lo a, tui thianghlim an la thei lo bawk. Kawtthlerah mitthi ruangte hnutchhiah an ni a, hospital tin chu a khat em em vek bawk a ni," a ti.

Red Cross-te damdawi thawn luh hi khawpui chhunga damdawi-in hrang hrangah semdarh nghal a ni.

Houthi helpawlte hian an ram khawpui, Sanaa chu an thununna hnuaiah an dah tawh a, chhim lam khawpui Aden hi lak leh tumin an bei mek a ni. Hetihlai hian Saudi Arabia kaihhruaiin Arab ṭangrual ramte chuan Yemen sipaite puiin helpawl lakah hian thlawhtheihna hmangin beihpui an thlak chhunzawm zel.

World Health Organization chuan Yemen ram tualchhung indona vang hian mi 643 an thi tawh a, midang 2,200 velin hliam an tuar niin a sawi. Mi sing tel chuan an in leh lo an tlanchhiatsan tawh bawk.