IS-in Yazidi mi 200 chuang an chhuah
Islamic State (IS) firfiakte chuan Nilaini khan Yazidi mi an man 200 chuang zet an chhuah. Heng mite hi nikum nipui laia Iraq hmarlam, Kurdish biala Yazidi hnam chenna khuate an beih ṭuma an man an ni.
Firfiakte an chhuah zalen zinga tam zawk hi hmeichhia leh naupang an ni a, damlo eng emaw zat an awm bawk.
Iraq hmarlam Kurdish bial vengtu, Peshmerga force commander Rassol Omar chuan firfiakte'n an mi mante an chhuah theihna atan hian Arab tribal hruaitute'n theihtawp an chhuahpui thu a sawi. Mahse chhuah an nih theihna atan hian intiamkamna a awm leh awm loh erawh a hriat loh thu a sawi.
Yazidi mi chhuah zalente hi Peshmerga sipaite hian an lo dangsawng a, an ni hian Kurdish regional capital, Irbil lamah an hruai nghal a ni. IS firfiakte hian a hmain Yazidi mi hi eng emaw zat an lo chhuah tawh bawk a ni.