Japan lal-in Indopui II-naa thite hriatrengna hmun a tlawh

Japan lal, Emperor Akihito leh a nupui, Empress Michiko-te chuan Palay rama Paleliu thliarkar-a Indopui II-naa Japan leh America mi thi te hriatrengna hmun an tlawh a, pangpar an dah.

Emperor Akihito chuan Palau pana an thlawhchhuah hma hian, "An ram chhan tura indona tualzawl pana, in lama haw tur awm loa ram tana nunna hlantute kan hrereng a ni," tiin a sawi a, Pacific Ocean-a thiarkar mawi tak takte chuan chanchin hriat reng tur leh chhinchhiah thlak an nei a ni," a ti.

Akihito hi kum 81 mi a ni tawh a, Indopui II-na a tawp khan kum 11 mi a ni a, hetihlai hian a pa, Hirohito chu Japan lal a ni.

Indopui tawp dawna Japan sipaite'n an ram chhan tuma an beih zing­ah Peleliu thliarkar hi a tel a ni. He thliarkarah hian Septmber 1944 aṭang khan thla thum chhung zet an indo a, Japan mi 10,000 bakah America mi 1,700 in an thihphah a ni.

Indopui II-naa Japan sipai, an ram pawn lama indona avanga thi hi mi maktaduai 2.4 vel an ni a, heng zinga a zahve vel chauh hi an phumna chin hriat an ni a, mi 300,000 vel chu tuipuiah an thi nia rin an ni.

Palau hi Philippines khawchhak lam, mel 500 vela hlaah a awm a, Indopui I-na hnuah khan Japan-in kum 30 chhung a awp a ni.