Trump leh Harris ten Presidential debate an nei
US President thlanna neih tura Republican party candidate, Donald Trump leh Democratic party candidate, Kamala Harris te chuan an ram huna Thawhlehni zan khan Philadelphia-a National Constitution Center ah presidential debate an nei.
Democrats lam in presidential candidate an thlak hnuah, Trump leh Harris te hian debate an neihna hmasa ber niin, America rama inṭhendarhna thlenah an inpuh tawn nasa hle.
Presidential candidate pahnihten debate an neihna hmunah hian chhimtu mipui an awm lo a, mahse America hmun hrang hrang bakah, an ram pawn lam thlengin mi maktaduai telin live-in an lo thlir thung. National Constitution Center pawn lamah erawh mi ṭhenkhat pungkhawmin, Gaza-a inkahhai puan a nih chuan Harris an vote tur thu an lo aupui.
Thawhlehni zana debate neihah hian Kamala Harris chu a inbuatsaih ṭhain, a che ṭha deuh zawka ngaih a ni a, mahse hei hian voter zinga ngaihdan la siam fel thei lo zingah eng angin nge nghawng a neih dawn erawh a la hriat loh niin an sawi.
Hetih lai hian debate moderator-te chuan Trump thusawi chungchangah fact-checking an neih nasat viau laiin, Kamala Harris thusawi erawh fact-check an nei lo thung a, debate-ah pawh thu belh chian dawl lo eng emaw zat a sawi a, hei hi sawi chhuah sak a ni lo nia sawi a awm ve bawk.
Candidate pahnihte hian minute 90 chhung debate hi an nei a, an policy chungchangah debate hi neih tura tih ni mah se hun tam zawk chu mimala inbeihna atan an hmang. Harris chuan Trump hi nau tihtlak khapna dan siam leh, US Capitol beihna thlengah mawhphurtuah a puh a, Trump hian Harris chu immigration leh ramri chungchanga a record sawiselin, hei bakah a policy a thlak kual leh avangin a bei ve bawk.
Harris hian Trump chu dictator, Vladimir Putin te angin an thunun vek tawh niin a sawi a, Trump chuan president Joe Biden kaihhruai Democratts sorkar foreign policy chu a nep lutuk tiin a sawi ve bawk a ni.
November 5 hian US President hi thlan a ni dawn a, mipui ngaihdan lak hnuhnung berah chuan Harris hian point tlemin hma a hruai mek a ni.