Iran President-in Iraq a tlawh

Iran president Masoud Pezeshkian chuan nimin, September 11 khan Iraq a tlawh a, President a nih hnua ram dang a tlawhna hmasa ber a ni. Iran leh Iraq hian Middle East boruak chhe mek karah inzawmna nghet zawk siam an tum nia rin a ni.

Kumin July thlaa Iran President atana thlan, Pezeshkian hian Iraq prime minister Mohamed Shia al-Sudani chu kawmin a, ram pahnihten Gaza Strip-a indona thleng mek leh, Middle East boruakte an sawi dun a, thawhdunna tur inremna pawh eng emaw zat an ziah rin a ni bawk.

Iraq Prime Minister media office pawhin ram pahnihte hian trade, agriculture leh communication lama thawhdunna tur, memorandum of understanding (MoU) 15 vel an ziak dawn tih a sawi.

Iran President thlen hma lawk, Thawhlehni zanah khan Baghdad International Airport-a US kaihhruai ṭangrual pawl sipaite hmunpui chu Katyusha-type rocket hmanga kah a ni. He rocket hi military base chhungah a tla a, a puak zui nia sawi a ni. Thil tih chhiat a nei em tih erawh report a awm lo thung.