Israel-in Hamas mi mante hrenna hmun video-in ti chhuak

Israel chuan Hamas firfiakten Israel an beih ṭuma an mi man zinga mi paruk, August 29 zana an thah takte an hrenna leh an thahna hmun leiverh chu a video-in a ti chhuak.

He video hi sipaite hian kar liam ta Zirtawpnia an lak kha niin, Thawhlehni khan mipuite en theih turin an dah chhuak. Sipai thupuangtu, rear admiral Daniel Hagari chuan forensic team-in Hamas mi hrente thah an nih dan an chhui lai chu video hian lak a ni tih a sawi a, mipuite hmuh tura dah chhuah a nih hma hian Hamas in an thah takte chhungte leh Israel security cabinet-in an en hmasa phawt a ni.

Hamas-te hian an mi hren mi parukte chu August 29, 2024 khan thatin, an ruang hi ni hnih hnuah Gaza chhim lam, Rafah-ah Israel sipaiten an chhar a ni. Hagari chuan Hamas hian leiverh chhungah hian an mi hrente hi an kaphlum tih sawiin, he leiverh hi lei hnuai meter 20 vela thuk niin, a san zawng feet 5.6 leh a zau lam inches 32 vel niin a sawi. Leiverh aṭanga chhuahna an siam hi Rafah-a in pakhata naupang room ah a chhuak niin a sawi bawk.

Hagari chuan leiverh hi a zim hle tih sawiin, din ngil theih a nih loh bakah thawk pawh a harsa hle niin a sawi. Hamas hian an mi mante hi helai hmunah hian kar eng emaw zat an dah nia a lan thu a sawi bawk.

Leiverh chhungah hian plastic bottle, zu dahna atan an hman leh inthiarna atana hman, bucket pawh a awm a, a chhuatah hmeichhe thawmhnaw pawh awmin, chess set pawh a awm bawk. Israel sipaite hian he leiverh awmna lai tak hi an sawichiang lo a ni.

Hamas-ten an mi hrente an kahhlum lai hian Israel sipaite hi leiverh chung lamah firfiakte nen an inbei niin Hagari chuan a sawi.