Kamala Harris duhsak lutuka puhin US presidential debate moderator-ten sawisel hlawh

US presidential candidate pahnih, Kamala Harris leh Donald Trump ten an ram huna Thawhlehnia zana presidential debate an neihah, debate buatsaihtu ABC News chu candidate pahnihte thliar hrang leh, Harris duhsak uchuaka puhin sawisel an tawk zui nasa hle.

Journalist leh ABC News-a political director hlui, Mark Halperin chuan candidate pahnihte thusawi a dik leh dik lo finfiahna, fact-checking neihah debate moderator pahnih, David Muir leh Linsey Davis-te chuan Republican candidate Donald Trump chauh an neih sak a, Kamala Harris thusawi belh chian dawl tawk lo awmte erawh fact-checking engmah nei loin, a lakah an nem hle niin a sawi. ABC News chuan Harris dik lohna chu a theih ang angin a thupsak a ni, a ti. Moderator-te chet dan chu debate neih zana hlawhchhamna lian ber a ni tiin a tarlang.

Political analyst, presidential debate moderator pawh lo ni tawh ṭhin, Megyn Kelly pawhin ABC 2024 presidential debate buatsaih chu na takin a sawisel bawk. ABC thil tum ber chu Trump-ah chiah 'fact-checking' neih sak a, Harris chu a duh dan ang anga dawt sawi tir a ni, tiin debate neih tawh a hriatah duhsakna inlantirna nasa ber a nih thu a sawi.

Social media lamah pawh Muir leh Davis te hian sawisel an tawk nasa hle. Political commentator Noah Pollak chuan moderator pahnihte chu presidential debate neih tawhah moderator chhe ber an ni tiin, Harris an duhsak lutukna avangin an intihmingchhia a ni, a ti.

Donald Trump pawhin ABC debate buatsaihah hian moderator-te chuan amah chauh chu an bitum niin a sawi a,Harris thusawi dik lo te an 'fact-check' ve duh loh avangin amahin a tihte a ngai nia sawiin, an chet dan avang hian an licence pawh tih tawp sak hial tlak a ni, tiin a sawi.

Debate thlirtu mi mtd 67 awm

ABC News buatsaiha Donald Trump leh Kamala Harris-te presidential debate hi a hmuna chhimtu awm loa pek chhuah a ni a, mahse TV leh internet lam aṭanga lo thlir mi mtd 67 zet an awm. June thlaa president Joe Biden leh Trump-ten debate an neih thlirtu aiin 31% in an tam zawk a ni.

Debate hi ABC New buatsaih ni mah se, network dang 17-ah pek chhuah a ni. Thlirtu zingah hian kum 18-49 inkar tam berin 53% an tling. Cable network aṭang chuan Fox News-in thlirtu ngah berin, an channel aṭanga en hi mi maktaduai 9.1 an tling.

Presidential debate neih tawha thlirtu ngah ber chu 2016-a Donald Trump leh Hillary Clinton-te debate neih hmasak ber kha niin mi mtd 84 in an thlir a, 2020-a Trump leh Biden debate hmasa ber kha mi mtd 73.1 in an thlir bawk.

President candidate pahnihte debate neih leh tur hi ruahman lawk a la awm lo a, mahse Harris campaign lam chuan vawi khat neih leh an la duh tih sawiin, Fox News Channel chuan buatsaih a inhuam thu a sawi. CBS chuan October 1 hian vice-presidential candidate a buatsaih dawn thung.