Thailand-ah tuilian vangin in tam tak a chim

Thailand hmarlam, Chiang Rai province-ah ruah sur nasa avangin tui a lian a, chenna in tam tak a chim. Thailand sorkar chuan lawng leh helicopter hmangin harsatna tawkte ṭanpui turin nimin khan speicial force a tir.

August thla laihawl aṭang khan ruah surin chhiatna hrang hrang a thlenah mi 33 an thi tawh a, tun hnaiah ruah keng tel, typhoon Yagi a thawh leh bawk avangin chhiatna a thlen belh nasa hle a ni. Tun karah chhiatna thleng vanga thi mi pakua an awm tawh bawk.

Tuilian hian district 17 a khaw 450 te a nghawng mek a, chhungkaw 14,328 ten harsatna an tawk niin Department of Disaster Prevention and Mitigation (DDPM) chuan a tarlang.

Thailand hmartawp province, Chiang Rai-ah hian Mai Sai district chu tui lian tuar nasa ber an ni a, hmun ṭhenkhatah chuan tui lian hi kam ṭan deuh mah se, lui kam vela chengte erawh chuan tuilian hi an la tuar chhunzawm reng a ni.

Thailand hmarlama khawpui lian ber, Chiang Rai City-a kawngpui pawimawh leh khawpui chhung hmun tam tak chu tuiin a la chim bawk. Sorkar chuan harsatna tawkte tan hian ei tur leh tui thianghlim in turte chu Thai Air Force helicopter hmangin a thawn lut mek a ni.

Office of National Water Resources chuan nimin khan an rama province 36, an khawpui Bangkok pawh huamin, ruah sur nasa avanga tuilian thleng thei reng a ni tiin, mipuite pawh fimkhur turin a chah.