WHO-in coronavirus hming atan Covid-19 vuah

Khawvel tiralkheltu leh khawvelin a buaipui mek, novel coronavirus leng mek hming (official name) chu 'Covid-19' tiha vuah a nih thu World Health Organi­zation (WHO) chuan a puang.  

Official name atana Covid-19 tih an hman thu hi Geneva-a thuthar thehdarhtute hmaah WHO chief Tedros Adhanom Ghebreyesus chuan a sawi a ni. 

Geneva-ah hian coronavirus chungchang sawihoin  ni hnih awh meeting neih a ni a, meeting-ah hian he hri hi official name pek an rem ti ta a ni. He hming hi ram hming, ramsa hming emaw mihring hming emaw nena in ang lo thei ber tura phuah a ni a, nakin zela coronavirus leng thei a lo awm leh thut huna a hming hi hman chhunzawm a nih theih nana phuah a nih thu Tedros chuan a sawi bawk.

He hri leng mek vanga thi hi mi 1000 chuang an awm tawh avang leh, mi 10000 chuangin an kai tawh avangin, he hri leng mek hian official name a neih a ṭul tawh tih WHO lam chuan an tarlang. China-ah hian he hri leng kai mi 42,200 chuang hriatchhuah an ni tawh a, nimin thleng khan mi 1,100 chuangin an thihpui tawh bawk a ni.

China thuneitute chuan he hri leng hi nitina kai belh la awm reng mah se, he hri kai pun chakna hi 20% a a hniam thu an tarlang. April thlaah chuan hri leng mek hi a tawp tawh an rin thu senior medical adviser chuan a sawi bawk. 

Mahse hetih lai hian  hri leng mek chungchangah ram hrang hrangte chu an harh chhuah a, he hri hi mipuite tana hmelma number one anga ngai tura an duh thu WHO hotu chuan a sawi. Coronavirus leng mek chu ram hrang hrangten firfiakte beihna anga  ngaih hial tura a duh thu leh, a ven leh do letna kawngah theihtawp chhuah a ngaih tawh thu a sawi. 

Vaccine chu thla 18 velah a awm thei dawn chauh tih  Ghebreyesus chuan sawiin, hman­rua awm ang chu hman ṭangkai zel phawt a ngai a ni, a ti.