Iran hrekna hlih a nih loh chuan nuclear deal kan ziak lo ang: Iran President

Iran President Hassan Rouhani chuan khawthlang ramte'n economic lama an ram an hrekna zawng zawngte an hlip a nih loh chuan nuclear deal an ziah­pui dawn lo tih a sawi.

Ningania Iran nuclear technology day hmannaah President Rouhani chuan he thu hi a sawi a ni. ''Nuclear deal kan siam dawn chuan inremna kan siam ni turah kan ram hrekna zawng zawngte hlih a ni tur a ni, hlih a nih loh chuan inremna hi kan ziak dawn lo," a ti.

P5+1 leh Iran hian nuclear deal siam tur hian hun eng emaw chen inbiak­na an neih hnuah, kar hmasa khan Laussane, Switzerland-ah June thlaa inremna siamfel tura hma lak an remti thei a ni.

President Rouhani chuan Saudi Arabia kaihhruaia Arab ṭangrual ramte'n Yemen-a Houthi hel laka beihpui an thlak chu a sawisel bawk. Rouhani chuan Yemen President Abed Rabbo Mansour Hadi kaihhruai sor­kar chhanna atana Saudi Arabia kaihhruaia beihpui thlak chu thil tihsual lian tak nia a ngaih thu sawiin, inkahhai puang tura a duh thu a tarlang.

Iran President chuan, "Kan inunauna hi chawi nungin, ram hrang hrangte hi inzahtawn ang u. Bomb an nih avangin eng ram mah an inpe dawn lo a, naupang pawisawilo tihhlumte hi a tawp a ngai a ni. Yemen-a tualchhung indona tihtawpna tura inkahhai puan te, indona tuartu mipuite chhawmdawlna pek an nih theih dan turte ngaihtuah a ngai a ni," a ti.

Iran ram hotu lu ber, Supreme Leader Ayatollah Ali Khamenei pawhin khawthlang ramte nen nuclear agreement siam tura hmalakna chu a hlawhtling ngei dawm em tih sawilawk theih a ni lo tih a sawi. Khamenei chuan inremna siam tur hnialna emaw, lo lawmna hran emaw a nei lem lo tih a sawi a, hemi rual hian Iran zahawmna leh hlutna dodal zawnga inremna siam tum erawh a duh dawn lo tih a tarlang.

Nuclear deal siam turah hian khawthlang ramte leh Iran aiawhte hi inbe fel thei mah se, Iran thutawp siamna tur erawh chu Khamenei kutah hian a awm dawn a ni.