2050-ah khawvelah Muslim leh Kristian inzat thuak tawh dawn

Khawvel ram hrang hrangah Muslim an pung chak hle a, hei vang hian kum 2050-ah chuan khawvel puma Kristian leh Muslim awm zat a inzat thuak tawh dawn niin Pew Research Center chuan a tarlang.

Pew Research Center hian khawvela sakhaw lian zual pariat, ram 128 a mite chu kawng hrang hrangin a zirchiang a, tuna an pun chhoh dan ang zela an kal a nih chuan Muslim hian Kristian te hi an zat thei thuai dawn a ni.

Kum 2010-a sakhaw hrang hrangte dinhmun aṭangin zirchianna hi neih ṭan a ni a, hemi kum hian khawvela Muslim awm zat chu 23.2% an ni. Mahse Muslim-te hi pung chak hle a, kum 2050-ah chuan 29.7% an tling thei dawn a ni. Kum 2070-ah chuan Kristian aiin Muslim hi an tam tawh zawk ang.

Hetihlai hian Kristian-te hi an pung chak lo thung a, kum 2010-ah khawvel pumah Kristian 31% (mi tluklehdingawn 2.2 vel) awm chu kum 2050 ah chuan 31.4% chauha an pun rin a ni.

Kum 1910 khan khawvela Kristian zinga 66% chu Europe khawmuala cheng an ni a, mahse 2010-ah chuan Europe-ah hian 26% chauh an awm tawh. Sub-saharan Africa-ah Kristian te hi an pung chak thung a, kum 2010-ah Kristian zinga 38% chu he bialah hian an awm.

Pew chuan US-a Kristian awm zat chu an kiam zel dawn niin a chhut bawk a, kum 2010-a Kristian 78% awm chu kum 2050-ah chuan 66% ah an tlahniam dawn ni, a ti. US-a Muslim awm zat pawh hi 1% aṭangin 2.1% ah a kaichho ang a, Juda mi awm zat erawh chu 1.8% aṭangin 1.4% ah a tlahniam thung dawn a ni.

Kristian ram tia chhal hi kum 2010 khan ram 159 a awm a, mahse 2050-ah chuan ram pariatin a kiam ang. Hetihlai hian 2050 ah chuan Muslim ram chu kum 2010 aiin pahniha pungin, ram 51 a awm tawh ang.